သောမတ်စ့်အယ်ဒီဆင် (Thomas Edison) ဟာ လျှပ်စစ်မီးလုံးကို တီထွင်ခဲ့စဉ်က မီးလုံးအတွင်းက နန်းကြိုးမျှင်ကို လျှပ်စစ်လွှတ်လိုက်ရင် အလင်းရောင်ပေါ်လာနိုင်စေဖို့ သတ္တုအမျိုးမျိုးနဲ့ အကြိမ်ပေါင်း ၁,၀၀၀ လောက် စမ်းသပ်ခဲ့ရတယ်။ နောက်ဆုံးကျမှ တန်စတင်းသတ္တုမျှင်သုံးပြီး လျှပ်စစ်မီးလုံးကို တီထွင်နိုင်ခဲ့တယ်။ မအောင်မြင် ကျရှုံးမှုနဲ့ ကြုံတွေ့တိုင်း လက်မလျှော့ ဆက်ကြိုးစားဖို့ ပြောရင် အယ်ဒီဆင်ကို စံထားပြောလေ့ရှိကြပါတယ်။
အခုခေတ်မှာ သူ့လို လူမျိုးတစ်ယာက် ရှိနေပါတယ်။ သူဟာ ရှုံးနိမ့်မှုပေါင်း ၉,၅၂၉ ကြိမ် ကြုံတွေ့ခဲ့ပေမဲ့ အရှုံးမပေးလို့ နောက်ဆုံးမှာ အောင်မြင်သွားသူပါ။ သူ့နာမည်က Tom Corley ပါ။
Tom အသက် ၉ နှစ်သားအရွယ်မှာ သူ့မိဘတွေဟာ လုပ်ငန်းရှုံးလို့ မီလျံနာသူဋ္ဌေးဘဝကနေ နေ့ချင်းညချင်း မွဲသွားကြတယ်။ သူဟာ နောက် ၁၄ နှစ်တာကလမှာ ဆင်းရဲပင်ပန်းစွာနဲ့ အသက်မွေးခဲ့ရတယ်။
၂၃ နှစ်အရွယ်မှာ အောင်မြင်သူတွေနဲ့ ရှုံးနိမ့်သူတွေ ဘာများကွာခြားသလဲဆိုတာ သိချင်လာတယ်။ ဒီတော့ သူဟာ မီလျံနာသူဋ္ဌေး ၂၂၃ ယောက်နဲ့ ဆင်းရဲသူ ၁၂၈ ကို သူတို့ နေ့စဉ်ဘာတွေ လုပ်သလဲဆိုတာ တွေ့ဆုံမေးမြန်းစောင့်ကြည့်တာတွေ လုပ်နေခဲ့တယ်။ ၅ နှစ်အကြာမှာ သူဟာ အောင်မြင်သူတွေနဲ့ ဆင်းရဲသားတွေရဲ့ နေ့စဉ်ပြုမူ ပြောဆိုတာတွေဟာ အများကြီးကွာခြားနေတယ်၊ ဘာတွေကွာခြားတယ်ဆိုတဲ့ အချက်တွေကို တွေ့ရှိလိုက်တယ်။
သူ့ရဲ့တွေ့ရှိချက်တွေကို လူတွေကို ပြောပြချင်လို့ Rich Habits: The Daily Success Habits of Wealthy Individuals" ဆိုတဲ့ စာအုပ်ကို ရေးလိုက်တယ်။
စာအုပ်ကိုတော့ ရေးပြီး သွားပြီ။ လူတွေဖတ်အောင် လူတွေလက်ထဲ ရောက်အောင် လုပ်ဖို့ လိုလာပြီ။ Tom က သူ့အတွေ့အကြုံကို ခုလို ပြောပြပါတယ်။
# ၁၄၄ ကြိမ် ကျရှုံးခြင်း
ကျနော့်စာမူကို မိတ္တူကူးပြီး စာပေပွဲစား (literary agents) ၁၄၄ ယောက်ဆီကို စာအုပ်ထုတ်ဝေသူရှာပေးဖို့ ပို့လိုက်တယ်။ ပွဲစား ၃၀ ဆီက အကြောင်းပြန်ကြားလာပါတယ်။ ဆောရီးပါ။ ထုတ်ဝေချင်သူ မတွေ့ပါဘူးတဲ့။ ကျနော် လက်မလျှော့ပါဘူး။
# ၁၃၆ ကြိမ် ကျရှုံးခြင်း
ကျနော်ဟာ စာအုပ်ထုတ်ဝေမဲ့သူကို ကိုယ်တိုင်ဆက်သွယ်တယ်။ ၆ လအတွင်း ထုတ်ဝေသူပေါင်း ၁၃၆ ယောက်နဲ့ တွေ့ပြီး ဆွေးနွေးတယ်။ အားလုံးက No ဆိုတဲ့ အဖြေပဲ ပေးတယ်။ ကံကောင်းချင်တော့ ထုတ်ဝေချင်သူ တစ်ယောက်နဲ့ တွေ့တယ်။ ကံဆိုးချင်တော့ သူနဲ့ဆွေးနွေးပြီး တစ်လအကြာမှာ သူ့ကုမ္ပဏီဟာ ဒေဝါလီ ခံသွားရတယ်။ ကိုယ်တိုင်ပဲ စာအုပ်ထုတ်တော့မယ်လို့ ဆုံးဖြတ်လိုက်တယ်။
# ၁,၀၀၀ ကြိမ် ကျရှုံးခြင်း
ကျနော်ဟာ စာအုပ်ဝေဖန်ရေးသမား ၁,၀၀၀ ဆီကို အီးမေးနဲ့ စာမူကို ပို့ပေးလိုက်တယ်။ သူတို့ သဘောကျရင် ကျနော့စာအုပ်အပေါ် ဝေဖန်ချက်ကို သတင်းစာမှာ ရေးပေးနိုင်လို့ပါ။ ဘယ်သူ့ဆီကမှ အီးမေးပြန်မလာပါဘူး။ မြို့ပေါ်က The Asbury Park Press သတင်းစာတိုက်ကို ကိုယ်တိုင်သွားပြီး စာမူသွားပို့ပေးတယ်။ အကြောင်း မပြန်ပါဘူး။ ဒါပေမဲ့ ကျနော်ကတော့ ဆက်လက်ကြိုးစားနေဆဲပါ။
# ၁,၉၀၀ ကြိမ် ကျရှုံးခြင်း
၁၈ လကြာအောင် အထက်တန်းကျောင်းနဲ့ ကောလိပ်တွေ၊ စာကြည့်တိုက်တွေနဲ့ ကုမ္ပဏီတွေက လူပေါင်း ၂,၀၀၀ ကို စာအုပ်ကို လိုက်ရောင်းတယ်။ လူအယောက် ၁၀၀ ကတော့ စာအုပ်ကို ဝယ်လိုက်ကြတယ်။
# ၁,၈၅၀ ကြိမ် ကျရှုံးခြင်း
ကျနော် ၂ နှစ်တိတိ ရေဒီယိုအသံလွှင့်ရုံ ၂,၀၀၀ ကို ဖုန်းဆက်ပြီး စာအုပ်အကြောင်း ပြောခွင့်ပေးဖို့ ပြောတယ်။ အသံလွှင့်ရုံ ၁၅၀ မှာ ပြောခွင့်ရတယ်။ ဟောပြောပွဲ တက်ရောက်လာသူတွေကို စာအုပ် ၇၀၀ ရောင်းလိုက်ရတယ်။ စာအုပ် ၅၀၀ ကတော့ အသံလွှင့်ရုံတစ်ခုထဲမှာတင် ရောင်းလိုက်ရတာပါ။ အောင်မြင်ဖို့ လမ်းစလေး ရေးရေးတော့ ပေါ်လာပြီ။
# ၂,၄၉၉ ကြိမ် ကျရှုံးခြင်း
ကျနော် အမေရိကန်တနိုင်ငံလုံးက သတင်းစာအယ်ဒီတာပေါင်း ၂,၅၀၀ ဆီကို ကျနော့်စာအုပ်ထဲက ထုတ်နူတ်ချက်လေးတွေကို ပို့ပေးလိုက်တယ်။ သူတို့သတင်းစာတွေမှာ ဖေါ်ပြပေးဖို့ပါ။ The New Jersey Star Ledger သတင်းစာက အယ်ဒီတာက ကျနော့ကို ခေါ်တွေ့ပြီး အင်တာဗျူးလုပ်တယ်။ ထုတ်နူတ်ချက်ကို သတင်းစာမှာ ဖေါ်ပြခံရပြီး မကြာခင်မှာ စာအုပ် ၁၇၃ အုပ် ရောင်းလိုက်ရတယ်။
# ၂,၀၀၀ ကြိမ် ကျရှုံးခြင်း
ကျနော်ဟာ စာအုပ်ရောင်းရတဲ့ ပိုက်ဆံနဲ့ စကောလားရှစ်ပညာသင်ဆုပေးမဲ့ ရန်ပုံငွေအဖွဲ့ ထူထောင်လိုက်တယ်။ အဖွဲ့ရဲ နာမည်ကို ကျနော့်စာအုပ်နာမည်ဖြစ်တဲ့ "Rich Habits" လို့ နာမည်ပေးထားတယ်။ ကျောင်းသားတွေနဲ့ မိဘတွေ စုစုပေါင်းလူ ၂,၀၀၀ ဆီ စကောလားရှစ်လျှောက်လွှာတွေကို အီးမေးနဲ့ ပို့ပေးလိုက်တယ်။ လျှောက်လွှာ ၂ စောင်တော့ ပြန်လာတယ်။ ပြန်ဆက်သွယ်ဖို့ လိပ်စာပါမလာဘူး။ အဲဒီလျှောက်လွှာ ၂ စောင်ကို ယနေ့ထိ အမှတ်တရ သိမ်းထားပါတယ်။
Lauri Flaquer ဆိုတဲ့ အယ်ဒီတာအမျိုးသမီးက ကျနော့်ကို ဆက်သွယ်လာတယ်။ သူတို့ရဲ့ TV Show အစီအစဉ် Focus Forward မှာ ကျနော့်စာအုပ်အကြောင်း အင်တာဗျူးလုပ်ချင်ပါတယ်တဲ့။ အင်တာဗျူး လုပ်ပြီးသွားတော့ Lauri က ကျနော့်စာအုပ်ကို ထုတ်ဝေမယ်လို့ ကမ်းလှမ်းလာတယ်။ ကျနော် နှစ်ပေါင်းများစွာ စောင့်စားနေခဲ့တဲ့ အခွင့်အရေးကို ဘယ်ငြင်းနိ်ုင်ပါ့မလဲ။ Lauri ရဲ့ အကြံပြုချက်အတိုင်း ကျနော့်ကို လူတွေသိစေဖို့ ကျနော့်ရဲ့ ဘလော့၊ ဖေ့ဘုတ်နဲ့ Twitter တွေမှာ ဆောင်းပါးလေးတွေ စရေးလိုက်တယ်။
မကြာခင်မှာ ကျနော့်ဘဝကို အကြီးအကျယ် ပြောင်းလဲသွားစေမဲ့ အီးမေးတစ်စောင်ကို လက်ခံရရှိလိုက်တယ်။ အီးမေး ပို့သူက ကျော်ကြားတဲ့ Yahoo internet show ဖြစ်တဲ့ Financially Fit တီဗွီအစီအစဉ်ကို တင်ဆက်သူ အမျိုးသမီး တိုရာဘီပါ။ သူက Twitter မှာဖတ်ရတဲ့ ဆောင်းပါးတစ်ပုဒ်ကို ကြိုက်လွန်းလို့ ကျနော့်နဲ့ စာအုပ်အကြောင်း အင်တာဗျူး လုပ်ချင်ပါတယ်တဲ့။ အင်တာဗျူးအစီအစဉ်ကို လူပေါင်း ၂ သန်းကျော် ကြည့်ခဲ့ကြတယ်။
မကြာခင်မှာပဲ ကျနော့်ရဲ့ "Rich Habits" စာအုပ်ဟာ အုပ်ရေ ၁၂,၀၀၀ ရောင်းချရပြီး Amazon ရဲ့ အရောင်းရဆုံးစာအုပ်တွေမှာ အဆင့် ၇ ချိတ်သွားခဲ့တယ်။ Best Sellr စာရင်းဝင် တစ်ယောက် ဖြစ်လာခဲ့တယ်။ ကျနော် အခု ဒီစာကို ရေးတဲ့အချိန် ၂၀၁၄ ခုနှစ် အောက်တိုဘာလ ၂၂ ရက်နေ့အထိ Rich Habits အုပ်ရေပေါင်း ဘယ်လောက် ရောင်းရပြီလဲ။ အုပ်ရေ တစ်သိန်းရောင်းရပြီလား၊ တစ်သန်းရောင်းရပြီလားဆိုတာထက် ကျနော့်ခေါင်းထဲမှာ တွေးနေမိတာက ကျနော်သာ စောစောက ပြောခဲ့တဲ့ ကျရှုံးမှုတွေကြောင့် လက်လျှော့လိုက်မယ်ဆိုရင် ဒီအခြေအနေ ရောက်မလာဘူးဆိုတာပါ။
ကျနော် ပြောပြချင်တာက "သင် လက်မလျှော့သေးသရွေ့ ကျရှုံးမှု မဟုတ်သေးပါဘူး။ လက်လျှော့လိုက်ပြီဆိုရင်တော့ အဲဒါ တကယ်ကျရှုံးမှုပါပဲ"။
Tom အပေါ်မှာ ပြောပြခဲ့တဲ့ ကျရှုံးတဲ့ အကြိမ်တွေကို ပေါင်းကြည့်လိုက်ရင် စုစုပေါင်း အကြိမ် ၉,၅၂၉ ရှိပါတယ်။
သင့်ဘဝမှာ တခုခုလုပ်လို့ တစ်ကြိမ်၊ ၂ ကြိမ် ကျရှုံးရုံနဲ့ လက်လျှော့ရှုံးပေးသင့်ပါသလားဆိုတာ စဉ်းစားစေချင်ပါတယ်။
# ဖြည့်စွက်ချက်။
Tom Corley ဟာ Rich Habits စာအုပ် သန်းချီရောင်းရပြီးနောက် သူ့လေ့လာတွေ့ရှိချက်တွေကို အခြေခံပြီး ချမ်းသာအောင်လုပ်နည်း၊ အောင်မြင်ရေးနည်း စာအုပ်တွေ ထပ်ရေးပြီး ထုတ်ဝေလိုက်ပါတယ်။ သူ့စာအုပ်တွေဟာ ကမ္ဘာမှာ ဒေါ်လာသန်းချီရောင်းရတယ်။ ဟောပြောပွဲတွေမှာ စကားပြောရင် ဒေါ်လာသန်းချီရတယ်။ သူဟာ အခု မီလျံနာတစ်ယောက် ဖြစ်နေပါပြီ။
ဗန်းမော်သိန်းဖေ
၃၀-၀၇-၂၀၁၆
No comments:
Post a Comment